మేలు రకం పశుసంపద ఉత్పత్తితోనే అధిక ప్రయోజనం
ఉమ్మడి మెదక్ జిల్లా అధ్యక్షులు గనుప లక్ష్మారెడ్డి
మేలు రకం పశు సంపద ఉత్పత్తితోనే రైతులకు అధిక ప్రయోజనం ఉంటుందని ఉమ్మడి మెదక్ జిల్లా పశుగణాభివృద్ధి సంస్థ చైర్మన్ గనుక లక్ష్మారెడ్డి పేర్కొన్నారు . దశాబ్ది ఉత్సవాల్లో భాగంగా సోమవారం అవుసులోని పల్లిలో మేలు జాతి లేగ దూడల ప్రదర్శనను ప్రారంభించిన సందర్భంగా ఆయన మాట్లాడారు . పశువుల్లో కృత్రిమ గర్భధారణ ఫలితంగా మేలు రకం , సంకరజాతి లేగ దూడల ఉత్పత్తి ఉండి వాటి సంరక్షణతోనే విస్తృత ప్రయోజనాలు ఉన్నట్లు తెలిపారు . నట్టల నివారణ చర్యలు తీసుకొని పక్షంలో ఏలిక పాములు , జలగలు , బద్దె పురుగులు వంటి అంతర పరాన్న జీవులు జీర్ణాశయము , పేగులలో ఉండి పోషక పదార్థాలు దూడకు అందనివ్వకుండా రక్తాన్ని పీల్చి బలహీనం చేస్తాయని పేర్కొన్నారు .
నట్టల వలన దూడలు ఎదగకుండా బలహీనంగా సన్నగా ఉంటాయని , దీని దృష్టిలో పెట్టుకొని నట్టల నివారణ మందు వేయాలని సూచించారు . ఆలాగే గాలికుంటు , గొంతువాపు , దమ్మ రోగం , బ్లూసెల్లాసిస్ వంటి అంటు రోగాలు సోకే ప్రమాదం ఉంటుందని , దీనిని దృష్టిలో పెట్టుకొని ముందస్తు టీకా ఇవ్వాలని స్పష్టం చేశారు . ఎండు గడ్డిలో ఉండే సెల్యూలోస్ ను లేగ దూడలు జీర్ణించుకోలేవని , పప్పు జాతి లేత ఆకులు లేగ దూడలకు ఆహారంగా అందించాలని అన్నారు . పశు సంపద ఉత్పత్తి , సంరక్షణ లక్ష్యంగా జిల్లాలో 150 మంది గోపాల మిత్రలు ఇంటింటికి తిరుగుతూ పశువులను వ్యాధుల బారిన పడకుండా చికిత్సలు చేస్తున్నట్లు చెప్పారు . రైతుల నుండి విజయ డైరీ నేరుగా పాలు సేకరిస్తుండగా , పాడి రైతులకు రుణ సదుపాయం సైతం కల్పిస్తున్నట్లు స్పష్టం చేశారు . సీఎం కేసీఆర్ రైతుల సంక్షేమాన్ని దృష్టిలో పెట్టుకొని అన్ని రకాల చర్యలు తీసుకుంటుండగా , పథకాలను సద్వినియోగం చేసుకోవాలని కోరారు . ఈ కార్యక్రమంలో సర్పంచ్ కరుణాకర్ , ఎంపీపీ అధ్యక్షులు లతా రమేష్ గౌడ్, జెడ్పిటిసి బాలు యాదవ్ , మండల వైస్ ప్రెసిడెంట్ బాల్ రెడ్డి , పశు వైద్యాధికారి సృజన , గోపాలమిత్రుల సంఘం రాష్ట్ర నేత రాంబాబు , జిల్లా అధ్యక్షులు సింగం రాజు , గోపాలమిత్రలు షాదుల్లా , భాస్కర్ గౌడ్ , స్వామి , సత్తార్ , సురేష్ , అఫ్జల్ ,
యాదగిరి , ఆంజనేయులు , రవి పాల్గొన్నారు .
