*నకిలీ ధ్రువపత్రాలపై విజిలెన్స్ విచారణ.. బాధ్యులపై చర్యలు: మంత్రి వివేక్ వెంకటస్వామి*
*క్లెయిమ్‌ల పరిశీలన అధికారుల బాధ్యత.. సిఫార్సుల పేరుతో వార్తలకు అతిశయోక్తులు వద్దు*
తెలుగు న్యూస్ హైదరాబాద్: కార్మిక శాఖ సంక్షేమ పథకాల కింద పరిహారం పొందేందుకు నకిలీ సర్టిఫికెట్లు, నకిలీ మరణ ధ్రువపత్రాలు సమర్పించినట్లు వచ్చిన ఆరోపణలపై విజిలెన్స్ విచారణ అనంతరం తగిన చర్యలు తీసుకుంటామని రాష్ట్ర కార్మిక శాఖ మంత్రి గడ్డం వివేక్ వెంకటస్వామి తెలిపారు. విచారణ నివేదిక ఒకటి నుంచి రెండు నెలల్లో వచ్చే అవకాశం ఉందని, నివేదిక ఆధారంగా బాధ్యులపై చర్యలు తీసుకుంటామని పేర్కొన్నారు.
*క్లెయిమ్‌ల ప్రాసెసింగ్ అధికారుల పరిధిలోనే..*
ప్రభుత్వ ఉత్తర్వుల ప్రకారం కార్మిక శాఖ డిప్యూటీ కమిషనర్లు, సంబంధిత అసిస్టెంట్ కమిషనర్లు క్లెయిమ్‌లను పరిశీలించి ప్రాసెస్ చేయాల్సిన బాధ్యత కలిగి ఉన్నారని మంత్రి వివరించారు. క్లెయిమ్‌ల పరిశీలన, పరిహారం చెల్లింపుల విషయంలో వారికి అధికారాలు అప్పగించామని చెప్పారు. ప్రతి దరఖాస్తు బోర్డు లేదా మంత్రి వద్దకు రావాల్సిన అవసరం లేదని, ఇది అధికారాల వికేంద్రీకరణలో భాగమని స్పష్టం చేశారు.
*పరిశీలించమని మాత్రమే లేఖ రాశా*
పరిహారం అందలేదని తన వద్దకు వచ్చిన ఓ వ్యక్తి దరఖాస్తుపై సంబంధిత అధికారులు పరిశీలించి అవసరమైన చర్యలు తీసుకోవాలని లేఖ రాసినట్లు మంత్రి తెలిపారు. అయితే, తాను ఆ లేఖలో పరిహారం మంజూరు చేయాలని సిఫార్సు చేయలేదని, దరఖాస్తును పరిశీలించాలని మాత్రమే సూచించానని స్పష్టం చేశారు.
సంబంధిత అధికారి దరఖాస్తును పరిశీలించిన అనంతరం పరిహారం మంజూరు చేయలేదని పేర్కొన్నారు. అయినప్పటికీ, మంత్రి సిఫార్సుతో పరిహారం మంజూరైనట్లు వార్తలు ప్రచురించడం వాస్తవాలకు విరుద్ధమైన అభిప్రాయాన్ని కలిగిస్తుందని అన్నారు.
*వాస్తవాల ఆధారంగానే వార్తలు రాయాలి*
ప్రజలకు వాస్తవ సమాచారాన్ని అందించడమే వార్తా మాధ్యమాల బాధ్యత అని మంత్రి పేర్కొన్నారు. ఒక దరఖాస్తును పరిశీలించాలని సూచించిన లేఖను పరిహారం మంజూరుకు చేసిన సిఫార్సుగా చిత్రీకరించవద్దని కోరారు. వార్తలను అతిశయోక్తులతో కాకుండా, వాస్తవాలను ధ్రువీకరించుకుని ప్రచురించాలని సూచించారు.
నకిలీ ధ్రువపత్రాల వ్యవహారంలో విచారణ పూర్తయిన తర్వాత నిబంధనల ప్రకారం చర్యలు తీసుకుంటామని మంత్రి స్పష్టం చేశారు.
